إبداع تكناوي - آلاء أبو هنطش وإبداعها في البرمجة

إبداع تكناوي - آلاء أبو هنطش وإبداعها في البرمجة

"أنا آلاء، بدرس هندسة وأمن شبكات الحاسوب. بتوقع إنّي محظوظة لأني عرفت الاشي الي بحبو و بلاقي حالي في بكير وهو البرمجة، كنت سنة أولى ومدّرسة المادّة خبّرتنا عن مسابقات البرمجة وإنّه بنقدر نشارك بهالمسابقات عن طريق الجامعة، أوّل ما حكت لنا بدأت أبحث على الانترنت عن الموضوع شفت الصور والفيديوهات وحسيت الموضوع فعلاَ كبير وكنت حابّه أجرّب شيء جديد وأطوّر حالي بالتّفكير، بس ما كنت عارفة لوين رح أوصل! خبّرتنا المس إنه رح تعمل جلسات تدريبيّة شاركت بالجلسات وبلشت أتدرّب وفعلًا حبّيت الموضوع.
لمّا قرّرت أشارك كنت متأكدة انو هالشيء ما رح يأثّر على دراستي إذا نظّمت وقتي بشكل صحيح، والحمد لله قدرت أنظّم وقتي.
وشاركت بالمسابقة على مستوى الجامعة، كمرحلة أولى كان عدد المشاركين قليل واللي يشارك يتأهل ع الأغلب أنه الموضوع كان جديد بالجامعة، أول مسابقة شاركت فيها على مستوى الأردن كانت 
JCPC بال 2013 وأخذنا المركز العاشر فيها كنت مبسوطة بالإنجاز اللي حققناه كثير وحسيت بنتائج تعبي.
من وقتها بلشت أتطور من كثير نواحي، ساعدتني على التفكير الإيجابي لأنه معظم الأسئلة اللي عم نحلها أثناء التدريب والمسابقات هي من واقع حياتنا وهاد الشيء طوّر لي تفكيري، ومن الجانب الاجتماعي كثير ساعدني من خلال تعرّفي على ناس كثير ومن جنسيات مختلفة، خاصّة بعد ما كنت شخصية خجولة. من الجانب الدّراسي كمان كان التأثير إيجابي، كنت لما آخذ مادّة جديدة يكون أصلاَ عندي فكرة عن مواضيعها اللي تعرّفت عليهم عن طريق المسابقات. بالإضافة للأجواء الحماسية الي بتخليني هالمسابقات أعيشها.
كنت لمّا أشارك بمسابقة أحدّد هدفي الي بدي أوصل له قبل ما أدخل المسابقة، بعدين اكتشف انو هالشيء مو ضروري أبدًا لأنه لما تعمل اللي عليك بحبّ، رح تلاقي نتائج ممتازة وهاد الي بحكيه لطلابي باستمرار.
أكبر فوز حققته بالمجال كان السنة الماضية لحصولي على المركز الأول في مسابقة 
JCPC الي هي على مستوى الأردن وبوقتها أبهرت نفسي كنت سعيدة جداً.
وأنا اليوم بدرّب طلاب من الجامعة على طريقة حل الأسئلة وطريقة التفكير بالمسابقة ليحققوا مراكز أولى وهاي التجربة رائعة بالنسبة الي وكمان الفرص الي بتعطيني إياها المسابقات بعد التخرج من خلال الشهادات الي بتكون بالCV في شركات مهمة جدّاً مثل: google / Microsoft / souq  ، اللي بتهتم وبتقدّر متل هاي الشهادات والمشاركة فيها وبتعطي فرص أكبر بالتوظيف لأنه هالأشخاص بيكونو أكيد واصلين لمستوى أفضل من غيرهم كونهم تدربوا و اشتغلوا على حالهم ليوصلوا للمشاركة.
حالياُ بنعمل محاضرات تعريفيّة عن المسابقات وبننشر إعلانات عنها حتى أي طالب عنده موهبة بهذا المجال يعرف يستغلها صح!
وإذا فعلا حبّ هالمجال مع شوية تنظيم وقت بين الدراسة والتدريب رح يصير حتى مستواه الدراسي أفضل.

بنصح أي طالب ما يتردد بالمشاركة مو بس بمسابقات برمجة، لكن بأي نشاط، لحتى يطوّر المهارات الحياتيّة، وهاد رح يوصلك للي بدك إياه أسرع كونك شخص مميّز."

إسراء البطاينة

المزيد من متفرقات