إبداع تكناوي - أمجد طوالبة وإبداعه في تأسيس أول مجلة في كلية الصيدلة

إبداع تكناوي - أمجد طوالبة وإبداعه في تأسيس أول مجلة في كلية الصيدلة

  في حال قرأت كلمة "spirit" رح يخطر على بالك "روح"، بس الوضع مختلف عندي، روح(ي) غير، شيء مختلف تماماً. روح(ي) هي إنجازي الأول اللي لامس حدود الحقيقة روح(ي) هي أول مجلة في كلية الصيدلة - بعد محاولات ماضية ما نجحت - ومنها بدأت أنا أمجد طوالبة مشوار إنجازي.
 عجبني مرة تعريف يمكن سمعته قبل خمس سنين من الدكتور طارق سويدان بحكي فيه عن الابداع فعرّفه: "بأنه عملية الاتيان بجديد"، وبرأيي كمان هو الاتيان بجديد ومختلف.
 الهدف هو التغيير عن كل شيء مكرر ومعتاد، تغيير نحو الأفضل.
  ما قبل فكرة المجلة أنه كان لازم أضيف أي شيء للمكان الي أنا فيه، وما أظل إنسان عادي، ممكن البعض يحكي شو الاشي الي ضفته؟ لكن بحكي إنه أول الغيث قطرة والجملة الي بكرّرها دائمًا: "القادم أعظم".
إني أتحدى نفسي كان من التحديات الصعبة اللي واجهتني، تفكر بإشي غير عن وظيفتك الاساسية اللي هي الدراسة في المرحلة الجامعية وكيف رح توفق بين الأمور بدون تقصير في واجبك. والحمد لله قدرت أوازن بين دراستي وواجبي الاساسي وبين العمل خارج المألوف. طرحت الفكرة على الفريق الطلابي اللي بشتغل معهم بالكلية وبالبداية جزء منهم شعر إنه رح تكون تحدي كبير لتطبيقه لكن لما شافو الشغل آمنوا بالفكرة ودعموني كتير وما بنسى الدكتور محمد شواقفة اللي كان معي خطوة بخطوة.
 بالنهاية؛ دائما بحكي التغير لازم يكون على مستوى الفرد بالأول، لكن البعض بستنى قرار جامعة أو فتح مجالات وفرص تيجيه لعنده.
 اللي بطمح للتغيير والابداع لازم يبحث عنه جواته ويبلش بحاله بالأول، ورح يشوف إنه كل اللي حواليه بتغير معه. دائمًا لازم تتذكر إنه وين ما كنت إنت قادر أنك تغير والقادم رح يكون أعظم.
نور فليفل

 

المزيد من متفرقات