إبداع تكناوي - نور العجلوني

إبداع تكناوي - نور العجلوني

أنا نور العجلوني خريجة هندسة مدنيّة ومديرة مشروع "مطر", كنت دائمًا أسأل حالي كيف النّاس المبدعين بفكّروا لحتّى يوصلوا لإبداعهم، مع الوقت عرفت أنهم بعملوا الأشياء التقليديّة بطرق جديدة بس طبعًا مش بالسهولة يلي بحكي فيها، لأنه حتّى الواحد فينا يعمل شغل مبهر ومبتكر بقدّم الوقت والجهد والمال في سبيله.
قبل أربع سنين انضممت  لمؤسسة "متطوّعو شباب إربد" وهي مؤسسة  بتعلّم الشباب كيف يصمّم ويدير مشاريع رياديّة.
بدأنا أنا وستّة أشخاص بتسجيل كتب ثقافيّة للمكفوفين لكن بعد ما قعدنا معهم وحكينا تبيّن أنّهم بحاجة أكثر للكتب الأكاديميّة ليحققوا طموحهم, وهاد كان أوّل درس الي, انّه ما افترض احتياج فئة معينه لأمر معيّن، لازم دائمًا تقعد معهم وتسأل وتعمل واجبك لحتّى تقدّم مساعدة حقيقيّة.
 بعدين بدأنا نستخدم الطّباعة على الوورد لأنه في  قوارئ بتقرأ الشاشة فبالتالي المكفوف بسمعها  فصار عنا كتب صوتيّة وكتب وورد,  بالـ2013 سكّرت المؤسسة فبطل معنا مصاري أو حتّى مكان لنشتغل، فتوجّهنا للفيسبوك عملنا جروب وصرنا نعلن عن الكتب الي الطلاب المكفوفين بحاجة الها واليوم عنّا تقريباَ 4000 متطوّع من كلّ الوطن العربي استطعنا نساعد 200 طالب مكفوف من داخل الأردن وخارجه.
اليوم مشروع مطر أسلوب حياة بالنسبة الي, وبشوف تأثيره على كلّ النّاس حولي الي بيساعدونا وبيستثمروا وقتهم بالخير كمتطوّعين والطلاب المكفوفين يلي عم ينجحوا ويتفوقوا والشكر لله.
سعادتنا عميقة رغم التّعب والجهد، من أجمل اللحظات يلي عشناها هي  انه أحد المستفيدين بحكيلنا انه لولا الكتب الي منوفّرها ما كان فكّر يدرس  بكالوريس في اللغة العربيّة من جامعة اليرموك هاد الأثر الي حابين نتركه وهاد هو الهدف.
اسم المشروع "مطر" بعبّر عن الخير الي بنشعر فيه لما نسمع صوت المطر حتّى من غير ما نشوفه وبالمثل الخير الي بحسو في المكفوفين  لما يسمعوا صوت الأشخاص يلي عم يأخذوا من وقتهم لحتّى يسجّلوا بأصواتهم كتب حتّى لو ما بشوفوهم.
الإصرار والإخلاص في العمل وإنّك تكون متأكّد انّو شغلك بمكانه ورح يوصلك للي بدك اياه ولو كان بعيد. حالياً خططنا انو نسجل المزيد من الكتب الأكاديميّة الجامعيّة لحتّى تكون بمتناول الجميع, ونسجّل كتب التوجيهي الأدبي وكتب ثقافية وملخّصات لها  حتّى يتمكّن الطالب المكفوف من أخذ فكرة عامّة عن الكتاب قبل تسجيله كاملاً.
إذا بتحب تتطوّع معنا ادخل على الجروبات التالية:

1. مشروع مطر – التحويل إلى وورد:

 https://www.facebook.com/groups/1148354218516363/

2. مشروع مطر - التّسجيل الصوتي: https://www.facebook.com/groups/964694666924210/

إسراء بطاينة

المزيد من متفرقات

15 Sep

ثروة المستقبل

لرؤية الخبر كاملاً انقر على الصورة

  نكبرُ وفي أذهاننا صورةً مبهرةً للإنسان الذي سنكون عليه في... اقرأ المزيد

26 Aug

تخصص الرياضيات

لرؤية الخبر كاملاً انقر على الصورة

وصف كارل فريدريش غاوس الرياضيات بأنها ملكة العلوم وكما يعرفها ... اقرأ المزيد